Министрлер кабинети менен Улуттук банк баанын өсүшүн токтото албайт – эксперт
«Кыргызстанда баанын өсүшүнө тышкы факторлор себеп болууда. Менин оюмча, Министрлер кабинетинин жана Улуттук банктын бааларды токтотууга реалдуу рычагы жок». Мындай пикирин экономист Азамат Акенеев бүгүн, 22-октябрда «Жаңы өкмөт: чакырыктар жана келечек» тегерек столунда билдирди.
Эксперттин пикиринде, инфляцияны басаңдатуу мүмкүнчүлүгү гана бар. Өкмөт бюджеттик кызматкерлердин, баанын көтөрүлүшүнөн эң көп жабыркаган аз камсыз болгондорго социалдык жөлөкпулдарды максаттуу бөлүштүрүү менен гана жардам бере алат.
«Биздин импортчулар рынокту кандырууга мүмкүндүк бербеген чектөөлөр дагы эле бар экенин айтышууда. Бул жерде баанын өсүшүн басаңдатуу үчүн тез арада чечимдерди кабыл алыш керек», – деди ал.
Белгилей кетсек, тогуз айдын жыйынтыгы боюнча Кыргызстанда инфляция 6.5%ды түзгөн. Тейлөөдөн баштап, спирт ичимдиктери менен тамекиге чейин баары кымбаттады.
Ошондой эле экономика тармагындагы эксперт Азамат Акенеевдин айткандарына таянсак, жакын арада Кыргызстанга инвесторлор келбейт. Жаңы өкмөт эмнелерди убада кылып, кандай аракет кылбасын, алар туруктуу саясий абалды күтүшөт.
«Мамлекеттик структураны өзгөртүүнү, шайлоо процесстерин аягына чыгара элекпиз. Жалпысынан алганда, бул белгисиздик мезгил улана берет», – деди ал.
Эксперттин айтымында, жакынкы эки жылда чоң көлөмдөгү инвестицияларды күтпөш керек. «Ошондуктан, учурда мамлекет гана өзүнүн ресурстарынын эсебинен инвестицияларды көбөйтө алат», – дейт эксперт.
