Фондулук биржадагы сооданын бир жумадагы көлөмү 20 млн сомду түздү
Өткөн аптада фондулук биржада сооданын көлөмү дээрлик 5 эсеге өсүп, 20 млн сомду түздү. Бул тууралуу Кыргыз фондулук биржасынын (КФБ) басма сөз кызматы билдирди.
Биринчи рынокто жайгаштыруу облигациялардын эки эмитенти «Салым Финанс» ААК жана «Биринчи Металлобаза» ЖЧКсы тарабынан жүргүзүлүп, секциянын жалпы соода көлөмү 17.4 млн сомду түзгөн.
Кошумчалай кетсек, 22-октябрда баштапкы рынокто жүгүртүү мөөнөтү 2 жыл болгон Мамлекеттик казыналык облигацияларды жайгаштыруу боюнча келишим болуп, анын көлөмү 93.01. сом баада 1.5 млн сомду түзгөн. Эскерте кетсек, биржада мамлекеттик баалуу кагаздардын бул түрү боюнча мурдагы келишим апрель айында катталып, анда баасы 95.35 сом болгон болчу.
Өткөн аптада экинчи рынок алсыз динамикасын көрсөттү, компаниянын акциялары жана облигациялары менен бүтүмдөрдүн көлөмү азайып, сооданын жалпы көлөмү болгону 1.1 млн сомду түздү. Стратегиялык компаниялардын акциялары боюнча айтсак, «Манас» эл аралык аэропорту ААКнын жана «НЭСК» ААКнын акцияларын кошкондо 300 миң сомго үч бүтүм түзүлдү. Ошол эле учурда «Манас» аэропортунун акциясынын баасы 400 сомго (+40 сом), «НЭСК» ААКнын акциялары 0.68 сомго (+0.18 сом) чейин көтөрүлдү.
