Өнөр-жай, айыл-чарба, курулуштагы өндүрүштүн төмөндөшү КРнын экономикасын калыбына келүүсүн токтотууда
Экономиканын негизги секторлорунда: өнөр жай, айыл-чарба жана курулуш тармагында өндүрүш көлөмүнүн төмөндөшү – өлкө экономикасынын калыбына келүүсүн токтотуп турган негизги фактор бойдон калууда. Бул тууралуу Улуттук банк маалымдады.
Улуттук банк билдиргендей, экономиканын негизги секторлорунда: өнөр жай (1.2 п.п.), айыл-чарба (-0.7 п.п.) жана курулуш (-0.5 п.п.) тармагында өндүрүш көлөмүнүн төмөндөшү өлкө экономикасынын калыбына келүүсүн токтотуп турган негизги фактор бойдон калууда.
«КРнын соода боюнча негизги өнөктөш өлкөлөрүнүн экономикаларынын активдүү калыбына келүүсү уланууда. Ошентсе да, өсүшү уланган инфляциядан жана коронавирустун кыйла кооптуу штаммдарынын пайда болуу тобокелдиктеринен улам, биздин региондун экономикасынын туруктуу өсүү траекториясына чыгуу процессинде белгисиздиктер күч алууда», – деп билдирет УБ.
Берилген маалыматка ылайык, 2021-жылдын январь-сентябрь айларынын жыйынтыгы боюнча, ИДПнын реалдуу өсүшү 0.1% деңгээлинде оң белгиге жеткен, «Кумтөр» алтын кенин казып алуу ишканаларын эске албаганда, ИДПнын өсүшү 3.6%ды түзүү менен өткөн айдын деңгээлинде сакталган.
Эскерте кетсек, КРнын Улуттук банк Башкармасы 2021-жылдын 25-октябрында эсептик ченди (негизги ченди) 7.5% деңгээлинде сактап калуу чечимин кабыл алды. Чечим 2021-жылдын 26-октябрынан тартып күчүнө кирет.
