КР менен Түркиянын ортосундагы соода жүгүртүү быйыл 10 айда 508 млн долларды түздү
КР менен Түркиянын ортосундагы соода жүгүртүү быйыл 10 айда 508 млн долларды түздү. Бул тууралуу КРнын Түркиядагы элчиси Кубанычбек Өмүралиев «Азаттыкка» берген маегинде айтты.
Анын айтымында, эки өлкөнүн ортосундагы соода 2018-жылы 450 млн доллар, 2019-жылы 507 млн долларды түзгөн.
«2020-жылы 507 млн, быйыл 10 айда 508 млн доллар болду. Бул Түркия мамлекетинин статистикалык кызматынын берген маалыматы. Бирок биздин маалымат дайыма 2 эсе аз көрсөтөт. Бул маселеде контрабандага байланышкан суроолор жатат», – деди ал.
Эскерте кетсек, Инвестиция министринин орун басары Нурадил Баясовдун 14-сентябрдагы маалымат жыйынында берген маалыматына ылайык, Түркия Кыргызстанга инвестиция салуу боюнча экинчи орунда турат. Биринчи жарым жылдыкта инвестициянын көлөмү 62 млн доллардан ашкан. КРнын ири инвесторлорунун баш сабында баягы эле Кытай турат.
