КРда эл аралык фондулук рынокко чыгууга жол ачкан инвестициялык платформа ишке кирди
Бишкекте эл аралык финансы рынокторуна чыгууну камсыз кылган биринчи Taighan Capital деген ата мекендик финансылык-инвестициялык платформанын бет ачары болду.
Платформа Кыргыз фондулук биржасында жана Россиянын, АКШнын, ошондой эле Европанын алдыңкы биржаларында сатылып жаткан акциялар жана облигациялар боюнча соодага аралашууга мүмкүндүк берет.
«Биз ар бир кыргызстандыкка глобалдык инвестиция дүйнөсүнө кирүүгө мүмкүндүк берүүчү көпүрөбүз. Биз чет элдик корпорациянын филиалы эмес, Кыргызстандын рыногундагы бирден-бир артыкчылыктарга ээ болгон жергиликтүү компаниябыз. Биздин максат – кыргызстандыктар үчүн инвестициялык инструменттерди кеңейтүү жана аны эң жеткиликтүү ыкмага айландыруу, анын ичинде жогорку технологияларды колдонуу», – деди компаниянын негиздөөчүлөрүнүн бири Улан Осмонов.
Платформа дүйнөдөгү 40 ири биржаларга, 21 миңден ашуун акцияга, 16 миңдей облигацияларга, 83 криптовалютага, ошондой эле чийки товарлар жана опциондор менен соода жүргүзүүгө мүмкүнчүлүк берет.
«Биз кызматташууга ачыкпыз жана Кыргыз фондулук биржасы, ата мекендик брокердик компаниялар, коммерциялык банктар, инвестициялык фонддор жана каржы рыногунун башка катышуучулары менен тыгыз байланыш түзө баштадык. Биздин платформа финансылык сабаттуулукту жогорулатууга жана өлкөдөгү фондулук рынокту өнүктүрүүгө жардам берет деген үмүттөбүз», – деди Taighan Capital компаниясынын негиздөөчүлөрүнүн бири Тимур Омоев.
