COVID-19: Чакан жана орто ишканалардын төрттөн бир бөлүгүнүн ишмердүүлүгү калыбына келе элек
COVID-19 пандемиясы чакан жана орто ишканаларга чоң таасирин тийгизди. Респонденттердин дээрлик төрттөн бири тигил же бул себептерден улам ишин уланта элек. Бул тууралуу Эл аралык эмгек уюмунун (ЭЭУ) ишканаларды өнүктүрүү боюнча техникалык кызматкери Мирза Мулешкович май-июль айларында жүргүзүлгөн сурамжылоонун жыйынтыгында билдирди.
Анын айтымында, сурамжылоого катышкандардын 11%ы жумушчуларга COVID-19 инфекциясын жуктуруп алгандыктан, 8%ы буюртмаларынын кыскарышынан жана 5%ы бийлик органдарынын буйругу менен ишин уланта электигин билдиришкен.
Ошол эле учурда респонденттердин жарымы гана ишин улантканын айтышкан. Дагы 21%ы ишмердүүлүгүн кайра жандандырса, 2%ы аны толугу менен токтоткон.
Сурамжылоого катышкандар пандемия учурундагы кыйынчылыктарды каражаттын жетишсиздиги (68%), чийки заттын жетишсиздиги (34%) жана товарларды жеткирүү көйгөйү (31%) менен байланыштырышкан. Ал эми 2021-жылы болсо респонденттер COVID-19 менен байланышкан жана каражаттардын жетишсиздигине (66%), чийки заттын жетишсиздигине (29%) жана товарларды жеткирүүгө (34%) байланыштуу көйгөйлөрдүн уланышын күтүшөөрүн айтышкан.
Суралгандардын үчтөн биринен көбү (34%ы) пандемиядан улам кадрлардын жетишсиздиги көйгөйүн айтышкан. Транспорт тармагы, транспорттук жабдууларды чыгаруу жана коммуналдык чарба тармагындагы ишканалардын 60%дан ашыгы бул маселеге туш болгон.
