Акылбек Жапаров мамлекеттик кызматкерлерди үгүт иштерине катышпоого чакырды
Бүгүнкү күндө ИИМ жана КРнын шайлоо жана референдум өткөрүү боюнча борбордук комиссиясы тарабынан шайлоо мыйзамдарынын бузулушуна байланыштуу 59 факты катталган. Бул тууралуу кечээ, 9-ноябрда өкмөттүн маалымат кызматы кабарлады.
Министрлер Кабинетинин Төрагасы Акылбек Жапаров шайлоо процессинин ачык-айкындыгын камсыздоо боюнча кабыл алынып жаткан чараларга жана мамлекеттик органдардын өкүлдөрүнүн ага кийлигишпөөсүнө тийиштүү билдирүү жасады.
Министрлер Кабинетинин Төрагасы белгилегендей, үгүт иштери башталгандан бери 10 күндүн ичинде КРнын шайлоо мыйзамдарын бузуу фактыларына байланыштуу төмөнкүдөй чечимдер кабыл алынды:
– Баткен облусунун Лейлек районунун мамлекеттик администрация башчысы-акими кызмат ордунан четтетилди
– Исфана шаарынын мэрине сөгүш жарыяланды.
Мындан тышкары, Ош шаарындагы студенттердин угүт иш-чараларына катышкандыгы үчүн:
– Ош мамлекеттик университетинин педагогика факультетинин деканы Б.Муратбаев жана ошол эле факультеттин 3 окутуучусу кызматтан алынды
– Ош мамлекеттик университетинин ректору К.Г.Кожобеков кызматтан алынды
– КРнын Билим берүү жана илим министри Б.Д. Купешевге, Ош шаарынын мэри А.И.Мамбетовго сөгүш жарыяланды.
«Сиздердин үгүт иш-чараларына катышууңуздардын кереги жок. Түз кызматтык милдеттериңиздерди аткарыңыздар. Сиздердин милдетиңиздер – шайлоолорду өткөрүү үчүн шарттарды камсыздоо. Жарандык позицияны шайлоо күнү добуш берүү аркылуу билдире аласыздар. Бүгүнкү күндө шайлоо процессине кийлигишпеңиздер», – деди Жапаров.
