Жоголгон мал-мүлкүбүздүн компенсация маселесин чечип бериңиз – Максат айылынын эли президентке кайрылуу жасашты
Баткен облусунун Лейлек районунун Максат айылынын тургундары президентке кайрылуу жасашты. Ал кайрылууда Максат эли 28-30-апрелдеги окуяда жоголгон мал-мүлкү боюнча компенсация маселесин жана Тажикстанга алып кирип кетишкен кыргыз жигитин чыгарып берүүнү талап кылышты. Андан тышкары, чек арада жашаган элдердин эч кандай киреше булагы жоктугунан, тургундар кыйналып жатышканын айтып, президентти көзмөлгө алуусун суранышты.
«Биз Максат айылынын тургундары 2021-жылдын 28-30-апрелдеги күтүүсүз окуядан кийин бир топ кыйынчылыктар болгонуна карабастан, патриоттуулугубузду көрсөтүп, жерибизге 100% көчүп келип, жашообузду улантып жатабыз», – деди аталган айылдын тургуну.
Тургундар президентке, жардам көрсөткөн жалпы кыргызстандыктарга терең ыраазычылыгын билдирип, андан тышкары, чек ара аймактарында курч турган маселелерди көтөрүштү.
«Чек арада жашаган элдер адал эмгек, өз маңдай тери менен тапкан техникалары барбы, малы барбы, ал эле эмес жигиттерибизди да кошуп Тажикстанга сүдүрөп алып кирип кетип жатышат. Биринчиден, жоголгон мал-мүлкүбүздүн компенсация маселесин чечип бериңиз. Экинчиден, Максат айылында 9 үй-бүлө камсыздандыруу уюмуна акча төлөп үйлөрүн камсыздандырып турган, ошол компания толук төлөп берүүсүн суранабыз», – деди Максат айылынын тургуну.
Андан сырткары, ал Тажикстанга алып крип кеткен кыргыз жигити тууралуу да айтты.
«Чек арага жакын жашаган жигитибизди Тажикстанга алып кирип кетишти. Ошону тез арада бошотуп берүүсүн талап кылабыз. Садыр Нургожоевич, сизден кыска мөөнөттүн ичинде жогоруда айтылган көйгөйлөрүбүздү чечип берүүңүздү суранабыз», – деди ал.
