Ысык-Көлдөн Алматыга түз жол курулат – АӨБ менен каржылоо боюнча сүйлөшүүлөр жүрүүдө
Ысык-Көлдөн Алматыга түз жол салынат. Министрлер Кабинетинин Төрагасынын орун басары Азиз Аалиев менен Азия өнүктүрүү банкынын (АӨБ) КРгы Туруктуу өкүлчүлүгүнүн директору Лао-Арая Канопкан «Алматы – Ысык-Көл альтернативдик жолу» долбоорун ишке ашыруунун техникалык, финансылык, экономикалык жана башка аспектилерин талкуулашты.
Министрлер Кабинетинин Төрагасынын орун басары долбоорду ишке ашыруунун маанилүүлүгүн белгиледи жана Азия өнүктүрүү банкынын өкүлдөрүнө колдоо көрсөткөнүнө ыраазычылык билдирди.
«Долбоор өлкөнүн туристтик, транспорттук жана соода потенциалына оңдуу таасирин тийгизет. Министрлер Кабинети аны ишке ашырууга ар тараптуу колдоо көрсөтөт», – дейт Аалиев. Ал ошондой эле тийиштүү мамлекеттик органдарга аны ыкчам ишке берүү боюнча тийиштүү иш жүргүзүүнү тапшырды.
Жолугушуунун жүрүшүндө тараптар ортосундагы кызматташуунун башка маселелери да талкууланды.
Белгилей кетсек, өткөн жылдын декабрь айында жарыяланган АӨБ отчетуна ылайык, Алматы шаарын жана Ысык-Көл облусун бириктирген альтернативдик жол республиканын ИДПсын 53-439 млн долларга жогорулата алат, ошондой эле жол кире наркын жана ага кеткен убакытты кыскартып, бул өз ара каттамдардын жыштыгынын көбөйүшүнө алып келет.
Жаңы жол аймактык экономиканы өнүктүрүү инструменти болуу менен катар туристтик агымдын көбөйүшүнө жана инвестиция тартууга түрткү болот.
