Эдил Байсалов: БШКнын сайтындагы мүчүлүштүккө Министрлер кабинетинин тиешеси жок
БШКнын сайтындагы мүчүлүштүккө Министрлер кабинетинин тиешеси жок. Бул тууралуу Эдил Байсалов «Азаттыкка» билдирди. Эскерте кетсек, БШКнын сайтында олуттуу мүчүлүштүк кетип, кээ бир партиялардын добуштары жоголуп кеткен.
Министрлер кабинетинин төрагасынын орун басары Эдил Байсалов парламенттик шайлоонун баштапкы жыйынтыгындагы мүчүлүштүккө Борбордук шайлоо комиссиясынын мүчөлөрү жана төрайымы түшүндүрмө бериши керектигин айтты.
«Министрлер кабинетинин буга эч кандай тиешеси жок. Президенттин администрациясы катардагы жарандардай эле экрандан жыйынтыкты көрүп турдук, катардагы жарандардай эле суроолорубуз көп. Түшүнгөн жокпуз», – деди ал.
Ошондой эле бул жыйынтыктын артынан жаралган ызы-чууну мамлекеттүүлүккө доо кетирген чагымга теңеп, нааразы болгон партия өкүлдөрүн сабырдуулукка чакырды. Ал жалпы жыйынтык электрондук системанын маалыматы менен эмес, бюллетендер колдо саналып бүткөндө аныкталарын кошумчалады.
Эскерте кетсек, Өмүрбек Текебаев дагы шайлоонун жыйынтыктарына нааразы болуп, бюллетендер колдо саналыш керек деген болчу.
