Ар бир онунчу добуш эсептелген жок – бюллетендер жараксыз деп табылды
Кечээ, 28-ноябрдагы парламенттик шайлоодогу бюллетендердин 9.64%ы, тагыраак айтканда, 116 246сы жараксыз деп табылды. Таптакыр белги коюлбаган жана башка каталары бар бюллетендер эсептен чыгарылганын БШКнын маалымат кызматы билдирди.
БШКнын маалыматына караганда, добуш берүүгө укуктуу 3 млн жарандын ичинен шайлоого алардын 30%ы гана катышкан.
28-ноябрда өткөн парламенттик шайлоонун баштапкы жыйынтыгына ылайык, алты партия 5%дык чектен өтүп, шайлоодо утканы айтылууда. Алар:
- «Ата-Журт Кыргызстан» – 16%
- «Ишеним» – 13%
- «Ынтымак» – 10%
- «Альянс» – 8%
- «Бүтүн Кыргызстан» – 6%
- «Ыйман нуру» 5% добуш алган.
Бирок кечээ БШКнын сайтындагы кетирилген мүчүлүштүтөрдөн улам, бүгүн төрт партия кайра шайлоо өткөрүүнү талап кылышууда. Бирок БШКнын төрайымы Нуржан Шайлдабекова бул добуш берүүнүн жыйынтыгына таасир этпегенин билдирген. Президент Садыр Жапаров болсо кечээ өзүнүн Фейсбук баракчасында добуштар саналбай калганын билдирген партияларга кайрылуусун жарыялап, БШК керт башы менен жооп берерин айткан.
