Шайлдабекова митингчилердин алдына чыкты – партиялардын мүчөлөрүн БШКга чакырды
Шайлоонун жыйынтыгына макул болбогон партиялар БШКнын имаратынын жанына митингге чыгышты. Алар БШКнын сайтында кетирилген мүчүлүштүккө байланыштуу кайра шайлоо өткөрүүнү талап кылышууда. Митингчилердин алдына чыккан БШКнын төрайымы Шайлдабекова шайлоонун жыйынтыгы кол менен эсептөөнүн жыйынтыгы боюнча чыгарылаарын билдирди.
«БШКдагы кетирилген каталар үчүн кечирим сурайм, бирок технология так иштейт. Бул алдын ала маалыматтар. Юридикалык мааниге ээ эмес. Жыйынтыгы кол менен саноонун жыйынтыгы боюнча чыгарылат. Учурда протоколдор келип түшүп жатат. Мыйзам бузгандар болсо жоопкерчиликке тартылат. Саясий партиялардын өкүлдөрүн БШКга чакырабыз», – деди ал.
Ал эми «Ата Мекен» партиясынын лидери Өмүрбек Текебаевдин айтымында, көптөгөн мыйзам бузуулар добуш берүүнүн тазалыгына шек келтирди.
«Мунун баары шектенүүнү пайда кылып, ири масштабдуу борборлоштурулган фальсификация жөнүндө ойлорду жаратат. Демократия жана саясий стабилдүүлүк чыгымдарды талап кылат жана мен аны татыктуу деп эсептейм. Болбосо экономика да, ишеним да, саясий стабилдүүлүк да болбойт», – деди ал.
Эске сала кетсек, «Ата Мекен», «Социал-демократы», «Азаттык», «Улуттар Биримдиги» партиялары кайра шайлоо өткөрүүнү талап кылып жатышканын билдиришкен. Алардын айтымында, БШКнын сайтындагы мүчүлүштүктөн кийин алардын жыйынтыгы 2.5-3 эсеге азайып, шайлоонун жыйынтыгын тааныбай жатышат.
