Кечээ, 1-декабрда «Менин үйүм 2021-2026» турак жай программасынын алкагында «Мамлекеттик ипотекалык компания» ААК менен «Бакай Банк» ААК Агенттик «Вакаля бил-истисмар» келишимине кол коюшту. Бул тууралуу «МИКтин» маалымат кызматы кабарлады.

Бул келишимге ылайык, «МИК» ААК өзүнүн Агенти (Вакил) катары ИФБ «Бакай Банк» ААКсын дайындайт, ал Мурабаха келишимине (б.а. бөлүп-бөлүп сатып алуу-сатуу бүтүмүнө) ылайык ипотекалык продуктуну чыгарат.

Ушул Агенттик макулдашуунун алкагында «МИК» ААКсы турак жай программасынын катышуучуларына исламдык каржылоонун принциптери (ИКП) боюнча ипотекалык продуктыларды чыгаруу үчүн инвестициялык каражаттарды ААКтын Ислам финансылык борбору (ИФБ) аркылуу берүүнү пландаштырууда.

«Жакынкы арада Кыргызстандыктар биринчи жолу шариатка жооп берген мамлекеттик ипотека алуу мүмкүнчүлүгүнө ээ болушат. ИФБ Кыргызстандагы жана КМШдагы биринчи ислам терезеси болуп саналат, ал «Бакай Банк» ААКсында түзүлгөн жана ислам принциптерине ылайык каржылык кызматтарды көрсөтөт. ИФБ Улуттук банк тарабынан лицензияланган, ал каржылоонун ислам принциптери боюнча каржылоого мүмкүндүк берет», – деп билдиришти уюмдан .

ИФБ өз ишин «КРнын Улуттук банкы, банктар жана банк иши жөнүндө» КРнын Мыйзамына, Улуттук банктын ченемдик укуктук актыларына жана Ислам финансы институттарынын бухгалтердик эсебин жана аудитин уюштуруунун шарият стандарттарына ылайык жүзөгө ашырат.