«Айыл Банк» ААК (мамлекеттик үлүшү 100%) уставдык капиталын 2.5 млрд сомго көбөйттү. Бул тууралуу бүгүн, 7-декабрда Бишкекте өткөн маалымат жыйынында банктын башкармалыгынын төрагасы Улан Букабаев билдирди.

Анын айтымында, банкты кошумча капиталдаштырууга каражат республикалык бюджеттен каралган. Кошумча капиталдаштыруудан кийин «Айыл Банктын» уставдык капиталынын көлөмү 6 млрд 24 млн сомго жетти.

Букабаев «Айыл Банктын» капиталынын көбөйүшү чоң окуя экенин белгилеп, бул экономиканы өнүктүрүү программалары боюнча көптөгөн маселелерди чечүүгө шарт түзөрүн белгиледи.

Айыл Банктын башчысынын айтымында, кошумча капиталдаштырууга багытталган 2.5 млрд сом кайрадан экономикага агылып, бул экономиканын өнүгүшүнө мультипликациялык таасирин тийгизет.