Дыйкандарды жер салыгынан бошотуудан 3 жылда орточо эсеп менен 1 млрд сом бюджетке түшпөй калат. Бул туурасында Айыл, суу жана токой чарба министринин орун басары Нурлан Шерипов «Марал» радиосуна билдирди.

Анын радиого берген маалыматына таянсак, бул жарлык түздөн-түз 349 дыйкан-фермердик чарбага, 328 айыл чарба кооперативине, 206 үрөн чарба жана асыл тукум чарбаларга тиешелүү болот.

«Жылына жалпы жер салыгынан 320 млн сом бюджетке түшүп турчу, ошондо 3 жылда орточо 1 млрд сом бюджетке түшпөй калат», – деди ал.

Эскерте кетсек, 6-декабрда президент Садыр Жапаров дыйкандарды жер салыгынан бошотуу тууралуу жарлыкка кол койгон.