Чаткалдагы алтын өндүрүүчү «Эти Бакыр Терексай» ишканасынын иши эки айга токтоду
Жалал-Абад облусунун Чаткал районунун Терек-Сай айылында жергиликтүү тургундардын нааразычылыгынан улам кыргыз-түрк алтын өндүрүүчү «Эти Бакыр Терексай» ишканасынын иши эки айга токтотулганын 24.kg агенттигине айыл тургундары билдиришкен.
Анда жергиликтүү тургун Юлдаш Даминовдун айтымында, 12-декабрда айыл тургундары заводго баруучу жолду тосуп алышкан.
«Биз президент Садыр Жапаровдун келишин талап кылганбыз. Анткени жергиликтүү жана аймактык жетекчилер биздин көйгөйлөрдү чече алган жок. Бирок бизге облус акиминин орун басары келип, эки айга комиссия түзүлүп, алтын казган компаниянын ишин, экологияга, жергиликтүү элдин ден соолугуна тийгизген таасирин иликтей турганын айтты. Жолду ачтык, бирок боз үйдү бузбай койдук. Ал түрк компаниясы менен болгон маселе чечилмейинче тура берет», – деген Юлдаш Даминов.
Эскерте кетсек, буга чейин деле жергиликтүү тургундар менен ишкананын ортосунда келишпестиктер болуп келген. Ушул жылы 9-сентябрда Терек-Сай айылынын тургундары «Эти Бакыр Терексай» алтын кенин иштеткен компаниянын ишмердүүлүгүнө нааразы болуп, митингге чыгышкан болчу. Жергиликтүү тургундардын айтымында, ишкананын ишмердүүлүгү абаны булгап, балдардын оорусуна себеп болууда. Эң чоң көйгөй чаң болууда деп билдиришкен эле алар.
- «Эти Бакыр Терексай» ЖЧКсы биргелешкен ишкана, 25% үлүшү Кыргызстандык «Кыргызалтынга», 75%ы Түркиялык «Эти Бакыр» ААКга таандык. Мында долбоорду каржылоо милдетин толугу менен түрк тарап мойнуна алган. Жаңы алтын өндүрүүчү фабриканын курулушу менен өндүрүштүк комплекти куруу 200 млн долларды талап кылат.
