Жакында антителага тапшырылган анализдер бекер болот
Жакында антителага анализдер бекер тапшырылат. Бул тууралуу Саламаттыкты сактоо министринин орун басары Улук-Бек Бектурганов Эл аралык иштер, коргоо жана коопсуздук боюнча комитетинин жыйынында билдирди.
Анын айтымында, СПИДке каршы глобалдык фонд лабороториялык жабдууларды КРнын аймактарына берип жатат, ал жерде антителага тапшырылган анализдер акысыз негизде алынат.
«Жакында бүт облустарда 3-4 жерлерде, анын ичинде Бишкек шаардык СПИДге каршы республикалык жана шаардык борборлордо тапшырууга болот», – деди Бектурганов.
Ошондой эле министрдин орун басары антителага анализдер республика боюнча 800 сомдон, жеке клиникаларда 1600 сомдон экенин билдирип, аталган анализ Казакстанда 3000 сомдон, Россияда 5000 сомдон, Швейцарияда 390 евро экенин жана бизде башка өлкөлөргө салыштырмалуу арзан экенин айтты.
Депутат Ирина Карамушка министрдин орун басарына Швейцария менен Кыргызстандын айлык акысын салыштырууга мүмкүн эмес экенин, КРда кээ бир мугалимдердин айлыгы 5000 сом экендигин эскертти.
