Үстүбүздөгү жылдын 1-январынан 15-декабрга чейинки аралыкта Кара-Кече көмүр кенинен 740 миң тонна көмүр казылып алынды. Бул көрсөткүч 2020-жылга салыштырмалуу 243 миң тоннага көп дейт Энергетика министрлиги.

2020-жылы бир жылда 497 миң тонна көмүр казылган.

Министр Доскул Бекмурзаевдин тапшырмасы менен 4 айдын ичинде жарым млн тонна көмүр казылып, Бишкек ЖЭБине, бюджеттик мекемелерге жана калкка берилген.

«Калкты көмүр менен камсыз кылуу үчүн иш үзгүлтүксүз жана активдүү жүрүүдө. Учурда күнүнө 30 техника иштөөдө. Суткасына орто эсеп менен 200гө жакын унаа көмүр ташып жатат. Биз калкты кыштан жылуу алып чыгыш үчүн, бар күчүбүздү жумшай беребиз», – деди Доскул Бекмурзаев.

Маалыматка ылайык 2021-жылдын сентябрь айынан баштап, декабрь айынын ортосуна чейинки аралыкта 508 миң тонна казылса, 2020-жылы акыркы 4 айда 345 миң тонна көлөмүндөгү кара алтын казылган.

Экономика тармагынын жана калктын 2021-2022-жылкы күз-кыш мезгилине республика боюнча жалпысынан 3 млн 18 миң тонна көмүр керектелет.

КР бир сезондо 3 млн тонна көмүр жагат, анын 1 млн 200 миң калк жагат. 240 миң тоннасы социалдык объекттерге кетет. 1 млн 600 миң тоннасын жылуулук борбору жагат, анын 600 миңи Казакстандан импорттолот.