Кыргызстанда 3000ге жакын ишкер бюджетке салыктык түшүүлөрдүн негизги бөлүгүн камсыздайт
Министрлер кабинетинин төрагасынын орун басары Бакыт Төрөбаев бизнес-ассоциациялардын жана бизнес өкүлдөрү менен жолугушуу өткөргөнүн кабинеттин маалымат кызматы кабарлады.
Жолугушууда Төрөбаев өлкөнүн өнүгүүсүндөгү бизнестин маанилүү ролун белгиледи.
«Бизнес – өлкөбүздүн экономикасын өнүктүрүүдөгү локомотив болуп саналат. Кыргызстанда 2896га жакын ишкер бюджетке салыктык түшүүлөрдүн негизги бөлүгүн камсыздайт. Өлкөбүздүн өнүгүшүнө ишкерлердин көлөмдүү салымы бар жана өлкө жетекчилиги муну жакшы түшүнөт.
Буга байланыштуу үстүбүздөгү жылдын июнь айында ишкерлер менен чоң жыйын өткөрүү сунушталууда. Биз бизнес менен биргеликте форум ийгиликтүү жана жемиштүү өтүшү үчүн жолугушуунун форматын талкуулагыбыз келет», – деди Бакыт Төрөбаев.
Бизнес-ассоциациялар мамлекеттик органдар менен бизнестин өз ара аракеттенүүсүнө кошумча түрткү бере турган бир катар сунуштарды киргизди. Ошондой эле кеңешме алкагында бизнес-форумду уюштуруу жана аны өткөрүү маселелери талкууланды.
