Ош шаарындагы Батыш РЭТинин курулушу сентябрда аяктайт
Энергетика министри Доскул Бекмурзаев түштүк жергесине болгон иш сапарында Ош шаарына курулуп жаткан Батыш райондук электр тармагынын (РЭТ) имаратына капсула салуу аземине катышты. Бул тууралуу министрликтин маалымат кызматы билдирди.
Райондук электр тармактарынын жаңы имараты Садыр Жапаровдун тапшырмасы менен, Ош шаарынын тургундарына көрсөтүлүүчү кызматтарды жакшыртуу максатында курулат. Анда Доскул Бекмурзаев 8-февралда мамлекет башчысынын катышуусунда Бишкек шаарындагы Түндүк РЭТинин ачылышы болгонун билдирди.
«Мындай объектилердин курулушу Кыргызстандын энергетикасы өнүгүү жолунда бара жаткандыгын жана ошондой эле анын мамлекетибиздин экономикалык жактан өнүгүшүнүн негизи болууга чоң мүмкүнчүлүгү бар экендигин далилдейт. Ал үчүн бизде баары: элдин колдоосу, көрө билүүсү жана өлкө жетекчилигин дарамети жетиштүү», – деди министр.
Ошондой эле ал Батыш РЭТинин курулушу үстүбүздөгү жылдын 31-августунда аягына чыгарыларын билдирди. Эске сала кетсек, буга чейин Ош шаарынын тургундарын электр энергиясы менен камсыз кылуу иштери 1967-жылы курулган эски имаратта жүргүзүлүп келет.
