Жерүйдөгү италиялык Diemme Filtration жабдууларынын тетиктери эми Кыргызстанда чыгарылат
Жерүй алтын кенин иштетүүчү «Альянс Алтын» компаниясы кендеги италиялык Diemme Filtration компаниясынын жабдууларынын тетиктерин «Дастан» ТНК ААКтын филиалынын базасында чыгарат. Бул тууралуу «Альянс Алтын» ишканасынын басма сөз кызматы билдирди.
«Жерүй кениндеги алтынды бөлүп чыгаруучу фабриканын жабдуулары мезгил-мезгили менен оңдолуп, жаңыланып турушу керек. Алыскы чет өлкөлөрдөн запастык тетиктерди сатып алуу жана жеткирүү маселеси акыркы убакта татаалдашкандыктан, «Альянс Алтын» компаниясы импортту алмаштыруу боюнча чараларды көрүүдө. Италиялык Diemme Filtration компаниясы чыгарган фильтр-пресстин 15тен ашык түрү эми Кыргызстанда чыгарылат», – деп айтылат ишкананын маалыматында.
«Альянс Алтын» КРнын өнөр жай ишканаларынын техникалык жактан жабдылышы жана бул тетиктерди чыгаруу үчүн квалификациялуу адистердин бар экендиги боюнча талдоо жүргүзгөн. Жыйынтыгында «Дастан» ТНК ААК филиалдарынын бири – «Дастан-35» ишканасында аталган тетиктер чыгара ала тургандыгы аныкталган.
Алтынды бөлүп алуучу Жерүй фабрикасынын башкы механиги Мирлан Арзыкулов жана «Дастан-35» ишканасынын конструкторлору запастык бөлүктөргө жана резина буюмдарына долбоордук документтерди, жумушчу чиймелерди жана техникалык шарттарды иштеп чыгышкан. Жакында Diemme Filtration фильтр-прессин ишке киргизүүгө мүмкүндүк берген жаңы запастык бөлүктөрдүн биринчи партиясы чыккан.
«Альянс Алтын» мындан ары да импортту алмаштыруу менен алектенүүнү жана ата мекендик ишканалар менен эки тарапка тең пайдалуу шарттарда кызматташууну көздөп жатканын билдиришти.
