Чет өлкөлүк университетте билим алууга мамлекет тарабынан берилчү стипендия 50 гана студентке берилет
Мамлекет чет өлкөлүк университетте билим алууга 50 студентти стипендия менен каржылайт. Бул тууралуу президент Садыр Жапаров өзүнүн Facebook баракчасында «Эл үмүтү» аттуу эл аралык стипендиялардын жаңы программасын ачуу боюнча Жарлыкка кол койгонун билдирди.
«Программада дүйнөнүн алдыңкы 100 университетинин биринин магистратурасы менен докторантурасына өткөн жаштарыбыз үчүн атайын стипендиялар каралды. Стипендияны быйылтадан тартып бере баштабайбыз, азырынча 50 стипендияны бөлүштүрүп туралы деп чечтик. Стипендиянын көлөмү тандап алган университетке жараша болот. Бирок эң жогорку суммасы 50 миң АКШ долларынан ашпоого тийиш.
Экономика жана гуманитардык адистиктер боюнча да тапшырсаңыздар болот, бирок, албетте, артыкчылык көбүрөөк техникалык жана инженердик багыттарга берилет. Илимдин доктору даражасы наамын алууга өзүнчө 10 стипендия бөлүнөт. Биз жаш окумуштуу-окутуучуларыбызды өзгөчө колдоого алалы деп жатабыз. Анткени алар студенттердин улам кийинки муунуна өз билимдери менен бөлүшүп турушат», – деп жазган Жапаров.
Ошондой эле ал президенттик стипендиянын жаңы программасынан сырткары, азыркы учурда өкмөт дүйнөнүн алдыңкы университеттери менен эки тараптуу максаттуу келишимдерди иштеп чыгууга киришкенин кошумчалады.
Бирок аталган стипендия кайсы финансылык булактан каржыланаары тууралуу азырынча маалымат берилген жок.
