Дүйнөлүк Банк КРнын билим берүү тармагына 25 млн доллар кайтарымсыз грант берет
Дүйнөлүк Банк КРнын билим берүү тармагын жакшыртууга 25 млн доллар кайтарымсыз грант берет. Бул тууралуу КРнын АКШдагы элчилиги билдирди.
6-майда Вашингтондо КРнын АКШдагы Элчиси Бакыт Аманбаев, Билим берүү министри Алмазбек Бейшеналиев баштаган кыргыз ректорлордун делегациясы Дүйнөлүк банктын Борбор Азия боюнча программасынын башчысы Джумена менен жолугушту.
Жолугушууда Аманбаев билим жаатында өлкөдө жүргүзүлүп жаткан мамлекеттик реформалардын маанисин баса белгилеп, бул тармактын артыкчылыктуу делинген багыттарына көңүлүн буруп, аларды кандай жолдор менен өнүктүрүү боюнча өз сунуштарын ортого салды.
Өз мезгилинде, Дүйнөлүк банктын өкүлдөрү «Келечек үчүн окутуу» долбоору тууралуу кеңири маалымат беришип, аталган программанын окуучунун жана мугалимдердин ишмердүүлүгүнүн натыйжалуулугун жогорулатууга, адам капиталын ар тараптуу жакшыртууга көмөк көрсөтүүгө багытталганын белгилешти.
«Талкуунун жүрүшүндө аталган долбоорду ишке ашыруу үчүн Дүйнөлүк банк тарабынан 25 млн доллар кайтарымсыз грант жакынкы күндөрү КРга берилээри маалымдалды», – деп айтылат билдирүүдө.
