Айыл чарбаны өнүктүрүүнүн эл аралык фонду КРнын РЖЖТ долбоорун каржылоого 31 млн доллар берет
Жогорку Кеңештин Эл аралык иштер, коргоо, коопсуздук жана миграция боюнча комитетинин жыйынында, министрлер кабинети менен Айыл чарбаны өнүктүрүүнүн эл аралык фондусунун ортосундагы «Регионалдык жайыт жамааттарынын туруктуулугу» (РЖЖТ) долбоорун каржылоо боюнча Келишимдин долбоору жактырылды.
«Долбоорго 31.28 млн доллар каралган. Анын ичинен 8.25 млн доллары грант жана 23.3 млн доллары 40 жылдык мөөнөткө 0.75% менен насыя катарында келет», – деди Айыл чарба министринин орун басары Нурлан Шерипов.
Долбоордун ишке ашыруу мөөнөтү 6 жыл жана бул бүткүл өлкө аймагында ишке ашырылат. Долбоордун максаты – айылдык фермердик чарбалардын туруктуулугун арттыруу, кирешелерин көбөйтүү жана экономикалык өсүшүн чыңдоо аркылуу айыл жеринде жакырчылыкты жоюуга көмөк көрсөтүү болуп саналат.
Долбоор негизги 3 компоненттен турат:
- токой-жайыт экосистемасын жамааттык туруктуу биргеликте башкаруу
- тамак-аш коопсуздугун чыңдоо
- аялдар жана жаштар үчүн климаттын өзгөрүүсүнө туруктуу кошумча нарк тизмекчесин өнүктүрүү.
Долбоор болжол менен 398 миң үй чарбага жардам берет.
