Бишкектеги бардык 72 автобус каттамдары өзгөрөт
Бишкек шаардык Транспорт жана жол-транспорттук инфратүзүмдү өнүктүрүү департаментинин директору Уланбек Бейшенбаев борбордогу коомдук транспорт системасын реформалоо боюнча кеңири пландар тууралуу журналисттерге маалымат берди.
Анын айтымында, өзгөрүүлөр учурдагы бардык 72 каттамды камтыйт. "72 каттамдын баары оптимизацияланат, башкача айтканда толугу менен өзгөртүлөт", — деди ал.
Айрым каттамдар айланма болуп өзгөртүлөт, бул транспорттук жеткиликтүүлүктү жакшыртып, жүргүнчүлөр агымын кайра бөлүштүрүүгө мүмкүндүк берет. Башкалары болсо толук жаңы схема менен иштей баштайт.
Бишкекте коомдук транспорт үчүн атайын бөлүнгөн тилкелердин санын көбөйтүү пландалууда. Алар Абдрахманов көчөсү, Жибек Жолу проспекти жана Түштүк магистраль боюнча уюштурулат. Бул автобустардын ылдамдыгын жогорулатып, тыгын маалындагы кечигүүлөрдү азайтууга багытталган.
Ошондой эле жол кире төлөөнүн ийкемдүү системасын киргизүү каралууда. Жүргүнчүлөр бир нече жолу которулушу мүмкүн, бирок бир саат ичинде бирдиктүү тариф иштейт.
"Ооба, бир нече которулуу болот. Бирок “Тулпар” картасы менен бир саат ичинде бир же бир нече каттамда 17 сом менен жүрүүгө шарт түзөбүз. Бир жолу төлөп, бир саат бою жүрө бересиң", — деп түшүндүрдү департамент жетекчиси.
