Быйыл Кыргызстанга Индиядан көп турист келет
Быйыл Индиядан Кыргызстанга көп турист келиши мүмкүн. Salvia promoters компаниясы менен меморандумга кол коюлуп, индиялык коноктордун агымын көбөйтүү үчүн иштер жүрүп жатат. Бул тууралуу КР Туризмди өнүктүрүү фондунун басма сөз кызматы билдирди.
7-8-июнь күндөрү Нью-Дели жана Мумбай шаарларында роуд-шоунун алкагында ири туристтик компаниялар жана инвесторлор менен жолугушуулар өтүүдө. 90дон ашык ишкана кызыкканын билдиришти.
Роуд-шоунун катышуучуларына алар кирише ала турган туристтик долбоорлор тууралуу айтылды. Алардын арасына медициналык туризм жана санитардык-курорттук комплекстерди өнүктүрүү, Кыргызстанда RestPoint тармагын куруу, борбор калаа менен «Манас» аэропорту жана Ысык-Көлдүн ортосунда үзгүлтүксүз байланышты уюштуруу, Каракол шаарындагы жана Раззаковдогу (Исфана) аэропортторду реконструкциялоо жана башкалар кирет.
Азыр Индияга 2.5 саатта учуп жетсе болот – буга чейин Бишкек менен Нью-Дели ортосунда чартердик рейс ачылган, аны Aeronomad компаниясы тейлейт. Келечекте авиакаттамдардын санын көбөйтүү пландалууда.
