Чет өлкөдөн которулган акчалар сом түрүндө гана берилиши керекпи?
Бүгүн, 8-июнда, Жогорку Кеңештин жыйынында эмне үчүн коммерциялык банктар башка өлкөдөн которулган акчаларды сом менен гана берип жатышкандыгы жөнүндө Улуттук Банктын өкүлдөрүнө суроо берилди.
«Эмне үчүн Россиядан которулган акчаларды элдер рубль түрүндө ала албай жатышат?» – деп сурады депутат Жалолидин Нурбаев.
«Эгерде Россиядан рубль менен акча которулса, бул жакта рубль түрүндө берилиши керек. Банктар рубль менен бербей, сом алгыла деп кардарларды мажбурласа, бул мыйзам бузуу болуп эсептелет. Мындай фактылар боюнча Улуттук Банкка кайрылышса, биз тиешелүү чараларды көрөбүз. Биздин сайтта бүт телефон номурлары жазылган… УБ жалпы кабыл алуучу номуруна түз кайрылса болот: (0312) 61-04-86», – деп жооп берди Улуттук Банктын төрагасынын орун басары Нурбек Жеңиш.
«Он күн мурун ушул суроо боюнча бүт коммерциялык банктардын жетекчилерин чакырып, эскертме бергенбиз. Эгерде ушундай фактылар катталса, биз мыйзам чегинде тиешелүү катуу чараларды колдонобуз», – деп дагы бир жолу эскертти Нурбек Жеңиш. Бирок доллар менен келген которуулар боюнча унчуккан жок.
Ал эми бул учурда коммерциялык банктар башка өлкөдөн келген доллар түрүндөгү которууларды кассада доллар жок деген шылтоо менен ылдый курс менен сом түрүндө берип жатат. «АКШдан гана которулган акчаны доллар менен бере алабыз, башка өлкөлөрдөн салынган долларларды доллар түрүндө берүүгө Улуттук Банк тыюу салган», – деп айтышууда «Демир Банк»,«Оптима Банк», «Кыргызкоммерцбанк» ж.б. бир катар банктардын кызматкерлери.
