Казино боюнча мыйзам комитетте үчүнчү окуудан өттү – ал онлайн кумар оюндарына жана ММКда жарнамалоого уруксат берет
Казино ачуу жана кумар оюндары боюнча мыйзам долбоору кечээ, 20-июнда, Жогорку Кеңештин Бюджет, экономикалык жана фискалдык саясат боюнча комитетинде үчүнчү окуудан өткөн. Бул тууралуу депутат Дастан Бекешев өзүнүн Telegram-каналында билдирди.
Парламентарий анын кабыл алынышына каршы добуш бергенин белгиледи. Ага жаңы деталдар себеп болгон: мыйзам долбоору онлайн-казинолордун иштешине жана кумар оюндарын бардык ММКларда жарнамалоого уруксат бермекчи.
«Биздин бюджеттик комитетте казино жана башка кумар оюндарын ачуу боюнча мыйзам долбоору каралды. Экинчи, үчүнчү окуудан өттү, мен каршы добуш бердим. Эмне үчүн капысынан позициямды өзгөрткөнүмө таң калган болушуңар керек. Чындыгында, бул мыйзам долбоору онлайн-казинолорго жана бардык маалымат каражаттарында, телекөрсөтүү, билборддордо бардык кумар оюндарын 24/7 жарнамалоого мүмкүндүк берет. Өкмөттө эмне дешсе да, бул жарандарыбыз казинодо ойной баштайт дегенди билдирет», – деди депутат.
Эскерте кетсек, министрлер кабинетинин башчысы Акылбек Жапаров казино ачууда бир дагы кыргызстандык киши кумар ойнобойт деп ишендирген.
