Чүйдө 31 жаңы социалдык объект курулуп, 36 объектке капиталдык оңдоо жүргүзүлөт

Президент тарабынан Чүй облусуна бөлүнгөн 10 млрд сомдун эсебинен аймакта 31 жаңы социалдык объект курулуп, 36 объектке капиталдык оңдоо жүргүзүлөрүн президенттин Чүй облусундагы өкүлү Азамат Осмонов “Кабар” маалымат агенттигине билдирди.

“Президент Садыр Жапаров Чүй облусуна өзгөчө көңүл буруп, 10 млрд сом бөлүү тууралуу чечим кабыл алды. Бул - жөн гана каражат эмес, аймакка болгон ишеним жана чоң колдоо. Демек, бул чечимдин жыйынтыгын эл кагаз жүзүндө эмес, өз күнүмдүк жашоосунда сезиши керек. Ошондуктан мындан ары ишти жаңы форматта алып барабыз. Мурдагыдай инерция менен эмес - так пландоо, жеке жоопкерчилик жана конкреттүү натыйжа принциби менен иштейбиз”,- деди Осмонов.

Ушуга байланыштуу облус боюнча өнүгүүнүн 6 артыкчылыктуу багыты бекитилгендигин айтты. Алар “Чүй Инвестиция”, “Чүй Агро”, “Чүй Туризм”, “Жашыл Чүй”, “Таза Чүй”, “Заманбап Чүй”.

“Инвестиция тартуудагы жаңы ыкма бул - биз бош айыл чарба жерлерин тарата берүү жолу менен эмес, биринчи кезекте токтоп калган өндүрүш ишканаларын жандандыруу багытында иш алып баруу практикасын киргизебиз. Облуста иштебей турган завод-фабрикалар бар. Алар даяр инфраструктурасы менен турат, бирок пайдаланылбай жатат. Биз ошол мүмкүнчүлүктү туура колдонушубуз зарыл. Бул багытта мамлекет токтоп турган ишканалардын ээлери менен меморандум түзүп, жаңы инвесторлор менен алардын ортосунда көпүрө болууга даяр.

Башкача айтканда, мамлекет “агенттик” принцип менен иш алып барып, объекти инвесторго сунуштап, сүйлөшүүлөрдү уюштурат. Чүй облусу - өлкөнүн экономикалык кыймылдаткычы. Ошондуктан аткаруучулук тартипти бекем сактап, ар бир бюджеттик каражатты максаттуу жумшап, жаңы инвестицияларды тартып, туруктуу жумуш орундарын түзүү боюнча так жана натыйжалуу иш алып баруубуз зарыл”,- дейт президенттин Чүй облусундагы ыйгарым укуктуу өкүлү.

Эскерте кетсек, 2026-жылдын январь айында президенттин Турукташтыруу фондунан Чүй облусун өнүктүрүү максатында 10 млрд сом бөлүнгөн.