Жаңы барактан баштайлы – экономика министри мүлктү легалдаштыруу тууралуу
Кечээ, 22-июнда Жогорку Кеңештин Бюджет, экономикалык жана фискалдык саясат боюнча комитети министрлер кабинетинин мүлктү легалдаштыруу боюнча мыйзам долбоорун карады.
Документте анын максаты мүлктү жана кирешени мыйзамдуу экономикалык жүгүртүүгө тартуу деп айтылат. Бул үчүн жеке жактардын мүлктөрүн өз ыктыяры менен декларациялоо аркылуу легалдаштыруу механизмин түзүү пландалып жатат.
Мындай жол менен башка бирөөлөргө катталган жана/же Кыргызстандын чегинен тышкары жайгашкан активдерди легалдаштыруу мүмкүн болот.
Депутат Дастан Бекешев бул мыйзам долбоорун бардык коррупционерлер пайдаланашы мүмкүн деп эсептейт. Көптөр бул мыйзам долбоорун чиновниктер “өзү үчүн” жазды деп эсептешет.
Экономика жана коммерция министри Данияр Амангелдиев Economist.kg басылмасына берген маегинде бул мыйзам долбоору эмне үчүн керек экенин айтты.
«Биз азыр бардык мүлктү, каалаган активдерди мыйзамдаштырууга мүмкүнчүлүк берип жатабыз. Бул бизнес үчүн жаманбы? Базарларда патенттик ишмердүүлүк менен киреше таап, чоң капиталга ээ болгон ишкерлер бар. Бул акчага, мисалы, соода борборун ачты дейли. Эртең алардан бул каражат кайдан деп сурашат. Алар каяктан тапканын далилдей албай калышат. Салык кодекси боюнча алар салык төлөөдөн качкан болуп чыгат. Биз азыр келип, баарын мыйзамдаштырганга мүмкүнчүлүк берип жатабыз. Аларда жыл сайын топтолгон жана эсептерде сакталган жүгүртүү каражаттары бар. Ал эми биз бардык капиталды мыйзамдаштырууга толук мүмкүнчүлүк берип жатабыз», – деп түшүндүрдү Амангелдиев.
Ал ошондой эле оффшордук эсептери бар кыргызстандыктарды эске салды.
«Бул оффшорлорду легалдаштырса болот, башкача айтканда, банктык эсептериңизде мынча сумма бар деп жазасыз, ошону менен бүттү – сизде ал бар же жок экенин эч ким текшербейт. Акча кантип табылганы маанилүү эмес. Бирок бул акча өлкөбүздүн экономикасына иштей турган болсо, мунун эмнеси жаман болсун? Албетте, ким мурда эмне кылганын чукулап олтура берсек, анда алдыга жылбайбыз», – деди министр.
