Жумушсуздук, кымбатчылык, коррупция - кыргызстандыктар өлкөдөгү эң олуттуу көйгөйлөрдү аташты

Кыргызстандыктар өлкөнүн эң орчундуу көйгөйлөрүн аташты. Респонденттердин 66%ынын айтымында, негизги маселе жумушсуздук жана кымбатчылык. Бул тууралуу Кыргызстандагы Эл аралык республикалык институттун (IRI) Аналитикалык изилдөөлөр борборунун (CISR) изилдөөсүндө айтылат.

Экономикалык көйгөйлөрдөн кийинки эң көп айтылган маселе (респонденттердин 33%ы белгиледи) – коррупция көйгөйү болду. Респонденттер ошондой эле көйгөйлөрдүн арасында суу маселесин (18%), социалдык кызматтарды (15%), тышкы чыр-чатакты (13%), саламаттыкты сактоо (12%) жана билим берүү (11%) тармактарын аташкан. Экономика, пенсия жана миграция маселелери 9%дан алышты.

Белгилей кетсек, респонденттер өздөрүнүн шаарында/айылындагы эң маанилүү көйгөй катары жумушсуздукту белгилешкен — респонденттердин 41%ы ушундай деп жооп беришкен. Дагы 30%ы жол жана көчөлөрдүн начар абалын жергиликтүү деңгээлдеги негизги көйгөй деп эсептесе, 20%ы – товарлардын баасынын көтөрүлүшүн, 19%ы – ичкенге таза суунун жоктугун эсептешет.