«Альянс Алтын» компаниясы Таласка таштандыларды сорттоочу завод курууга 6 млн сом берди
“Альянс Алтын” өнүктүрүү фонду Таласка таштандыларды сорттоочу завод курууга 6 млн сом бөлдү. Бул тууралуу Жерүй кенин иштетүүчү компаниянын басма сөз кызматы билдирди.
Завод Талас шаарынан 12 чакырым алыстыкта жайгашкан Калбин айыл өкмөтүнүн аймагында курулууда. Долбоорду «Эко Монтис» ЖЧКсы сунуштаган.
«2018-жылы Талас шаарындагы таштандыларды иштетүүгө 10 жылдык мөөнөткө келишим түзүп, уруксат алганбыз. Ошондон бери таштандыларды сорттоочу завод куруп, таңгакталган таштандыларды кайра иштетүүчү жайларга өткөрүүнү пландап жатабыз. Долбоорду ишке киргизсек, айына 200 тоннага чейин таштандыны кайра иштетебиз”, – дейт «Эко Монтис» ЖЧКсынын директору Янтар Атабеков.
Таштандыларды сорттоочу заводду курууга 8 млн сомго жакын каражат керектелет. Бүгүнкү күндө 1 млн 865 миң сом каражат салынган.
“Альянс Алтын” өнүктүрүү фонду тарабынан 5 жылдык мөөнөткө пайызсыз кайтарымдуулук менен 6 млн сом бөлүнгөн. Фонддун мындай колдоосу Талас районунун, өзгөчө шаардагы таштандыдан арылууга чоң салым кошууда», – деди Атабеков.
