Энергетика тармагынын бюджетинин таңкыстыгы 15 млрд 271 млн сомду түздү. Бул тууралуу бүгүн, 14-июлда Энергетика министри Доскул Бекмурзаев министрлер кабинетинин жыйынында билдирди.

Министрдин айтымында, энергетика компанияларынын бюджетинин таңкыстыгы арзан тарифтерге байланыштуу.

«Учурдагы тарифтер боюнча 2022-жылы 24 млрд 993 млн сом чогултууну пландап жатабыз. Ошол эле учурда энергетика тармагындагы чыгымдар 40 млрд сомдон ашат, тагыраак айтканда, айырма – 15 млрд сомдон көп. “Электр станциялары” ААКтыкы болсо 11 млрд сомдон ашык. Мындай тартыштык социалдык багыттагы тарифтердин эсебинен болду”, – деди министр.

Энергетикалык компаниялардын 2022-жылдагы бюджетинин тартыштыгы:

• “Электр станциялары” — 11 млрд 702.4 млн сом же жалпы көлөмдүн 76.6%
• «КУЭТ» — 1 млрд 695.1 млн сом же 11.1%
• «Түндүкэлектр» — 936.2 млн сом же 6.1%
• «Ошэлектр» — 254.8 млн сом же 1.6%
• «Чыгышэлектр» — 218.2 млн сом же 1.4%
• «Жалалабатэлектр» — 146 млн сом же 0.9%
• «Бишкек ЖЭБ» — 196.9 млн сом же 1.2%
• «Чакан ГЭС» — 121.6 млн сом же 1.1%.

Энергетика министрлиги буга чейин да ишканалардын каражатынын мындай тартыштыгы азыркы тарифтердин төмөн болушуна, ошондой эле импорттун жана Бишкек ЖЭБинде электр энергиясын өндүрүүнүн кымбаттыгына байланыштуу болгонун айтып келген.