«Дача-Су» окуясынан жабыркагандарга элден чогулган 30 млн сомду комиссия «бюджетти колдоого» берип салган
Дача-Су боюнча коомдук комиссиянын мүчөсү, “ПолитКлиника” порталынын жетекчиси Дилбар Алимова өзүнүн Facebook баракчасында жабыркагандар үчүн элден чогулган акча мамлекетке өтүп кеткенин жазып чыкты.
Анын айтымында, мындай чечимди ошол кездеги комиссия кабыл алган.
“Элден чогулган акчанын 30 млн 283 миң 620 сомун бюджетке, 390 455 сомун Соцфондго өткөрүп берип салышкан. «Эмне үчүн?» деген суроону бердим, анткени биздин жарандар бюджетти колдойбуз деп акча салышкан эмес да? Ал кездеги комиссиянын чечими болгон деген жоопту берип жатышат», — деп жазген ал.
Ошондой эле ал ACT Airlines компаниясы болгону 712 миң 480 доллар которгонун айтат.
«Дача-Су жыйынында белгилүү болгон жагдайлар. ACT Airlines компаниясы болгону 712 миң 480 доллар которуптур. Негизи самолёт алынганда камсыздандыруудан өтүшү керек, ансыз уча албайт. Бул учак эл аралык каттамдарды жасап жаткандан кийин ал минималдуу алганда 300 млн долларга камсыздандыруудан өтөт. Анын мааниси — эгер ал учак башка бирөөгө зыян келтирсе, камсыздандырудагы сумма ошол жакка төлөнүп берилиши керек эле.
Дагы бир маалыматтар боюнча компания 2 млрд долларга камсыздандыруудан өткөн дейт. Менин оюмча, бул компания чоң суммага камсыздандыруудан өткөнүнө карабай, биздин мамлекетти 720 миң доллар менен алдап кеткендей”, – дейт комиссиянын мүчөсү.
Эскерте кетсек, президент Садыр Жапаровдун жарлыгы менен Чүй облусунун Сокулук районунун Дача-СУ айылында мындан беш жыл мурда жүк ташуучу Боинг-747 самолету кулаган авиациялык кырсыктын себептерин изилдөө боюнча коомдук комиссия түзүлгөн.
Коомдук комиссия 2022-жылдын 1-ноябрына чейинки мөөнөттө авиациялык кыйроого алып келген жагдайлар, себептер жана шарттар жөнүндө корутундуну жана Дача-СУ айылынын тургундарынын проблемаларын комплекстүү чечүү боюнча сунуштарды бериш керек.
Каргашалуу окуяда Кыргызстандын жарандары – айылдын 35 тургуну жана Түркиянын жарандары – экипаждын 4 мүчөсү каза болгон. Расмий версия боюнча, Стамбул шаарына (Түркия) учуп бара жаткан самолет май куюу үчүн «Манас» аэропортуна багыт алган. Самолеттун кулашынын себебин учкучтардын кетирген катасы деп аташкан.
