Япония Кыргызстандын жарандарын заводдорго жумушка алууга даяр
Япония Кыргызстандын 300дөн ашык жаранын заводдорго жумушка алууга даяр. Бул тууралуу Эмгек, соцкамсыздоо жана миграция министрлигинен билдиришти.
14-июлда министр Кудайберген Базарбаев башында турган кыргыз тарап Япониянын «KOBE International Trade Promotion Association» компаниясынын башкы директору Широ Сурумаки менен макулдашууга кол коюшкан. Келишимге ылайык, «техникалык стажерлер» программасынын алкагында КРнын жарандары Японияда окуп жана андан ары ишке орношо алышат.
“Япон тарап менен Япониянын заводдорунда 300дөн ашык кыргызстандык жаранды ишке орноштуруу боюнча макулдашуу болду”, – деп айтылат билдирүүдө.
Бул келишимге кол коюу үчүн КРга Япониядан делегация келген жана ошондой эле алар жакынкы арада жумушка орноштуруу маселесин иш берүүчүлөр менен талкуулоону пландап жатышканын билдиришкен.
