Коррупция: Оштогу мэрияга тиешелүү 200 субъект иш алып барган алтын базар эки жылдан бери ижара акысын төлөбөйт
Ош шаарынын базар көчөсүндө (Шейит-Дөбө) жайгашкан мэриянын балансындагы алтын базар эки жылдан бери жергиликтүү казынага эч кандай ижара акысын төлөбөй келет. Бул тууралуу жергиликтүү T-media порталы жазды.
Жалпы аянты 27 сотых болгон жайда 200гө жакын субъект иш алып барат. Алар базардын ээсимин деген жаранга айына 800 сомдон 1500 сомго чейин акча төлөп турушкан.
Аталган медианын берген маалыматына ылайык, атайын тариф боюнча кичи базар ай сайын болжол менен 292 032 миң сом ижара акы төлөшү керек болгон. Бирок мекеме менен келишим түзүлгөндө ижара акысы дээрлик эки эсе азайтылып, 111 608 миң сом деп көрсөтүлгөн. Бирок бул сумма да эки жыл бою төлөнгөн эмес.
Эгерде тарифте көрсөтүлгөн суммада ижара акысы төлөнүп турган болсо жергиликтүү бюджетке болжолдуу 7 млн сомдон ашуун киреше түшмөк.
