2026-жылы Бишкекте 20 км суу түтүгү жана 12 км канализация тармактары алмаштырылат

2026-жылы Бишкек шаарында болжол менен 20 км суу түтүктөрү жана 11–12 км канализация тармактары алмаштырыларын "Бишкексууканал" муниципалдык ишкана  башчысы Чыңгыз Жумалиев экономикалык, бюджеттик, каржылык жана инвестиция боюнча Бишкек шаардык кеңешинин туруктуу комиссиясынын жыйынында билдирди.

Анын айтымында, 2023-жылга чейин бюджеттин чектелгендигине байланыштуу ишкана жыл сайын болжол менен 7 км суу түтүктөрүн жана 700 метр канализация тармагын гана алмаштырчу.

2023-жылдан тарта иштердин көлөмү көбөйүп, жыл сайын 20 км суу түтүктөрү жана кеминде 2–3 км канализация тармактары оңдолуп келет.

Быйыл приоритет катары "Кызыл куруучу" насос станциясынан тазалоочу курулуштарга чейин ар бири 5,5 км болгон 11 кмге жакын түтүк орнотулат. Бул иштерге болжол менен 400 млн сом кетет.

Мындан тышкары, "Үмүт" жашыл аймагында жайгашкан сифондук станция, бардык ассенизатор унаалар агынды сууларды төгүп жаткан жер, тазалоочу курулуштар аймагына көчүрүлөт. Бул аркылуу жыт көйгөйү жоюлат. Бул долбоорго 115–120 млн сом сарпталат.

Ошондой эле ишкана автобазаны реконструкциялоону пландоодо, анын баасы болжол менен 100 млн сомду түзөт.