Министрликтеги кызматкерлердин маянасы канчага көбөйөт? - 196%дан 232%га чейин көтөрүлөт
2022-жылдын 1-августунан тарта өлкөнүн мамлекеттик жана муниципалдык кызматкерлеринин эмгек акылары көтөрүлдү. Бул тууралуу өлкө башчынын маалымат кызматы билдирди.
Президент Садыр Жапаров «КРнын мамлекеттик жарандык кызматчылары менен муниципалдык кызматчыларына эмгек акы төлөө шарттары жөнүндө» Жарлыкка кол койду.
Мисалы, министрликтин бөлүм башчысынын учурдагы акы төлөө шарттарына ылайык, социалдык чегерүүлөрдү жана салыктарды эске алуу менен чегерилген эмгек акысы орточо эсеп менен 34 миң 445 сомду түзүп келген болсо, бүгүн 1-августтан тартып, алардын эмгек акысы 67 миң 749 сомду түзөт.
Эмгек акынын өсүшү орто эсеп менен 196.7%ды түзөт.
Ал эми министрликтин жетектөөчү адисинин учурдагы эмгек акы төлөө шарттарына ылайык, социалдык чегерүүлөрдү жана салыктарды эске алуу менен чегерилген эмгек акысы 21 миң сомду түзүп келген болсо, 1-августтан тартып эмгек акысы 49 миң 12 сомду түзөт.
Эмгек акынын өсүшү орто эсеп менен 232.3%ды түзөт.
“Бул чечимдин негизги максаты – өлкөнүн мамлекеттик жарандык кызматчылары менен муниципалдык кызматчыларынын ишинин натыйжалуулугун жана сапатын жогорулатуу үчүн материалдык жактан кызыктыруу жана шарттарды түзүү, ошондой эле жогорку квалификациялуу кадрларды тартуу жана мамлекеттик башкаруу секторунда коррупциялык тобокелдиктерди азайтуу“, – деп айтылат билдирүүдө.
