«Бишкек» ЭЭАнын директору Кудрет Тайчабаровдун Тойота Ланд Крузер унаасы менен iPhone 12 телефону талкууга түштү
Акыркы убакта социалдык түйүндөрдө «Бишкек» ЭЭАнын башкы директору Кудрет Тайчабаровдун атына байма-бай сындар айтылууда. Сындардын басымдуу бөлүгү “Бишкек” ЭЭАнын азыркы акыбалы кейиштүү абалга келгенине карабастан, анын башкы директору президент Садыр Жапаровго “таянып”, эркин аймактын ишмердүүлүгүн жогорулаткандын ордуна “люкс” унааларда жүрүп, социалдык түйүндөрдө аны сындагандар менен айтышып отурганы жөнүндө болууда.
- Кудрет Тайчабаров 2020-жылдын 14-ноябрында ошол кездеги премьер-министр Садыр Жапаровдун буйругу менен “Бишкек” ЭЭАнын башкы директору болуп дайындалган.
“ПолитКлиника” маалыматтык порталы «Бишкек» ЭЭАнын башкы директору Кудрет Тайчабаровдун кызматтык телефону тендерсиз алынганы чын (Фактчекинг) деген иликтөө макаласын чыгарды.
1-августта жарандык активист Атай Бейшенбек “Бишкек” эркин экономикалык аймагынын (ЭЭА) башкы директору Кудрет Тайчабаров ишкананын эсебинен 110 миң сомго уюлдук телефон (iPhone 12 Pro Max) жана 2 млн сомдон ашык каражатка автоунаа (Тойота Ланд Крузер 200) алганы тууралуу Фейсбук баракчасына жазып чыккан.
Ушул сыяктуу социалдык түйүндөрдөгү Тайчабаровго карата айтылган сындардын негизинде “ПолитКлиника” өзүнүн иликтөөсүн жүргүзгөн.
Тайчабаров өзү эмне дейт?
Аталган порталдын журналисттери Тайчабаровго блогерлердин билдирүүсү боюнча комментарий алуу үчүн байланышканда, ал сөз болуп жаткан уюлдук телефон тендерсиз алынганын тастыктаган.
Тайчабаров “Бишкек” ЭЭА мамлекеттик бюджетке кирбегендиктен, Бюджеттик кодекс аларга таасир этпей турганын кошумчалады. Андыктан буга чейинки сатып алуулардын көбү тендерсиз эле өтүп келген.
Ал эми блогерлер айтып жаткан автоунаа ишкананын эсебинен алынбаганын билдирди. Ал унаа “Бисталь” ишканасы ижара акысын төлөй албай калгандыктан, ЭЭАнын балансына өткөн.
“Бир гана машина эмес, имараттарды дагы ошентип баалап, өткөрүп алабыз, эгер [ишкана] карызын төлөй албаса. Кээ бир субъекттер орноткон трансформатор, подстанция, колдонгон жабдыктарын өткөрүп беришет. Ал эми сот менен чечилсе, сот аткаруучу келип, баарын баалап өткөрүп берет. Бул мыйзамдуу эле нерсе”, — деген Тайчабаров.
Жыйынтыгында журналисттер “Бишкек” ЭЭАнын башкы директору Тайчабаровдун кызматтык телефону делген iPhone 12 Pro Max тендерсиз алынганы чын деген жыйынтыкка келишкен.
Кошумча окуңуз: Манас Мураталиев: “Бишкек” ЭЭАнын субъекттери импорттук товарлар менен атаандаша албай келет
Эркин экономикалык аймактар. Эмне үчүн Өзбекстан ийгиликке жетишти, Кыргызстан жетишкен жок?
