Унаалардын айнегин акы төлөп караңгылатуудан эки айда бюджетке 70 млн сом түштү
Унаалардын каптал айнектерин караңгылатууга уруксат берүү башталгандан тартып 8-августка чейин 864 уруксат кагазы катталган. Өлкө бюджетине 69.7 млн сом түшкөн. Бул тууралуу 9-августта Ички иштер министрлигинин басма сөз кызматы билдирди.
Мекеме унааны тонировкалоого уруксат алууну каалаган ар бир жаран автоунаанын каттоо күбөлүгү жана паспорту же ишеним каты менен «Унаа» мамлекеттик мекемесинин каалаган каттоо бөлүмүнө кайрылса боло тургандыгын эскертет. Каттоо процедурасы 30 мүнөттөн ашпайт.
Уруксат алуунун баасы төмөндөгүдөй:
- жеке жактарга – 80 миң сом
- юридикалык жактарга – 100 миң сом
- башка өлкөнүн жарандарына – 120 миң сом
«Социалдык тармактарда уруксат кагаздарын арзан баада берүү тууралуу жарыялардын баары жалган Алдамчыларга жол бербөө үчүн Унаа МИ мамлекеттик мекеменин аймактык бөлүмдөрүнө гана кайрылууну өтүнөт», – деп билдирди ИИМден.
Уруксат 1 жылдык мөөнөткө берилет, эгерде менчик ээси уруксаттын мөөнөтү аяктаганга чейин колдонуудан баш тартса, төлөнгөн жыйым уруксатты пайдалануу мөөнөтүнө карабастан кайтарылбайт.
