Кумтөрдө финансылык мыйзам бузуулар аныкталып, Бөлтүрүк кызматтан алынды
Эсеп палатасы Кумтөр кениндеги сатып алуулар боюнча финансылык мыйзам бузуулардын бетин ачты. Бул тууралуу кечээ, 23-августта, минкабдын басма сөз кызматы билдирди.
Маалыматка ылайык, Кумтөр толугу менен Кыргызстандын менчигине өткөндүгүнө байланыштуу быйылкы жылдын май айында Эсеп палатасы тиешелүү текшерүү жүргүзгөн.
Натыйжада кенде финансылык мыйзам бузуулар аныкталган: күйүүчү-майлоочу материалдар, азык-түлүк, запастык тетиктер рыноктук баалардан жогору баада сатып алынган.
Буга байланыштуу Теңиз Бөлтүрүк жана финансылык директору Рыспек Токтогулов “Кумтөрдүн” жетекчилигинен алынышты.
«Кумтөр Голд Компани» жабык акционердик коомуна жаңы жетекчилер дайындалды.
Ошол эле учурда Теңиз Бөлтүрүк “Улуу көчмөндөрдүн мурасы” улуттук холдингинин жетекчиси бойдон калганын минкаб билдирди.
КР Башкы прокуратурасы жалпы көзөмөлдүн алкагында Улуттук коопсуздук мамлекеттик комитетинин (УКМК), ИИМ жана Эсеп палатасынын кызматкерлери менен бирге текшерүү иштерин баштады. Бул текшерүүнүн жыйынтыгы боюнча так маалымат коомчулукка кийинчерээк берилет.
Бүгүнкү күндө кенде алтын өндүрүү боюнча эч кандай көйгөй жок. Жылдык план аткарылат. Быйыл 17.5 тонна алтын казылып алынат, деп билдирди минкаб.
