«Кумтөрдө» тышкы башкаруу режими токтотулду
Минкаб төрагасы Акылбек Жапаровдун 23-августта чыккан тескемеси менен «Кумтөр Голд Компани» ЖАКты тышкы башкаруу жол-жобосу токтотулду. Бул тууралуу компаниянын басма сөз кызматы билдирди.
Ошентип, жалгыз аткаруу органы же коллегиялуу аткаруу органынын жетекчиси шайланган күндөн тартып, министрлер кабинетинин буйругу менен мурда киргизилген тышкы башкаруу тартиби токтотулду.
Ошондой эле, бул тескемеге жараша, “Улуу Көчмөндөрдүн Мурасы” улуттук холдинг компаниясы жана Теңиз Бөлтүрүк эки жуманын ичинде минкабга “КГК” компаниясын убактылуу сырткы башкаруунун бүткүл мезгилиндеги өзүнүн ишинин жыйынтыктары жөнүндө корутунду отчет берүүгө милдеттүү.
Буйруктун үчүнчү бөлүгүндө Экономика министрлиги, Финансы министрлиги, “Кыргызалтын” ААКсы жана “УМК” ушул тескемеден келип чыгуучу чараларды көрсүн деп жазылган.
Эске салсак, тышкы башкаруу 2021-жылдын 17-майында киргизилген.
