Кыргызстандын Акыйкатчы институту Кемпир-Абад суу сактагычынын Өзбекстанга берилишине каршы чыккан активисттерди, саясатчыларды жана журналисттерди кармоо учурунда одоно мамиле жасоо жана өмүрүнө тикелей коркунуч келтирүү сыяктуу мыйзам бузуу фактылары катталганын билдирди.

Билдирүүдө КР Акыйкатчы институту активисттерди тинтүү, суракка алуу жана кармоо боюнча адам укуктарынын сакталышына мониторинг жүргүзүүнү улантаарын айтат.

Акыйкатчы институтунун кызматкерлери Бишкек шаарынын төрт райондук ички иштер бөлүмдөрүндө, Аламүдүн райондук ички иштер бөлүмдөрүндө жана Бишкек шаардык ИИБде, ошондой эле Бишкек шаарынын убактылуу кармоочу жайларында кармалып, камакка алынган 18 адам менен жолугушуп, сурамжылоо жүргүзүшкөн. Алар: Мадеминов Т., Бекчоро уулу Э., Сасыкбаева А., Карасартова Р., Шабдан Али, Жээнбеков Р., Капаров Ч., Маматаев У., Асанбаев Н., Журабаева Г., Мамыркулова К., Бекназаров А., Асанов Б. ., Молдокматов Ж., Атай Бейшенбек, Акматов А., Сооронкулова К., Суранова П.

“Тинтүү учурунда айрым тартип коргоо кызматкерлери активисттерге жана алардын үй-бүлө мүчөлөрүнө орой мамиле жасашкан, аларга видео-фото тартууга тыюу салышкан, айрым активисттердин үй-бүлө мүчөлөрүнө таандык буюмдарын тартып алышкан жана милицияга чакыруу кагазын бербей туруп чакырган,” – деп жазылган билдирүүдө.

Кармалган жарандар менен “Кылым шамы”, “Жарандык демилгелер”, “Артикл 9” укук коргоо уюмдары жана адвокаттар да жолугушту.

Акыйкатчы институту Кемпир-Абад суу сактагычынын жерин коңшу мамлекетке берүүгө каршы чыккан активисттердин массалык түрдө кармалышын сынга алып, сотко чейинки өндүрүш учурунда алардын укуктары бузулбашы керектигин эскертүүдө.