БУУнун Адам укуктары боюнча кеңсеси Кыргызстандагы акыркы окуяларга комментарий берди
БУУнун Адам укуктары боюнча кеңсесинин өкүлү Элизабет Тросселл Кыргызстандагы соңку окуяларга байланыштуу кайрылуу жасады. Белгилей кетсек, буга чейин КРнын жарандык активисттери камоолор боюнча БУУнун жана Евробиримдиктин кеңселерине кайрылышкан болчу.
«Кыргызстанда 20дан ашык адам, анын ичинде активисттер жана блогерлердин үйүнө тинтүү жүргүзүлгөндөн кийин алар камакка алынышты. 24-октябрда алар эки айга камалып, аларга карата “зордук-зомбулук менен массалык баш аламандык уюштурган” деген олуттуу кылмыш иши козголгон.
Камалгандар Кыргызстандын түштүк-батышындагы Кемпир-Абад суу сактагычын коргоо үчүн түзүлгөн топтун курамына киришкен, анткени КР өкмөтүнүн чек араны делимитациялоо келишимине ылайык, суу сактагыч коңшу Өзбекстанга өткөрүлүп берилет. Алардын дарегине коюлган дооматтар активисттердин бул боюнча тынчсыздануусун коомчулукка билдирүүсүнө жана мамлекеттик чечимдерди кабыл алууда ачык-айкындуулукту талап кылуусуна байланыштуу болууда.
Биз бийликти аларга эл аралык укуктун негизинде тийиштүү процесстин жана адилет соттук териштирүүнүн кепилдиктерин толук камсыз кылуусун, анын ичинде сотко тез арада жеткирилишин жана алардын кармалышынын мыйзамдуулугун талаша ала тургандай болушун камсыздоого чакырабыз.
Элдин өз оюн эркин билдирүү жана маалымат алуу укуктары, коомдук талкууга катышуу укугу корголууга тийиш. Кемпир-Абад суу сактагычына келсек, жергиликтүү тургундар менен натыйжалуу кеңешүү жүргүүзүү зарыл”, – деп айтылат БУУнун Адам укуктары боюнча кеңсесинин комментарийинде.
