Бишкекте курулуш объектилерине кезектеги рейд жүргүзүлдү
Бишкек шаарында курулуш объектилерин текшерүү боюнча кезектеги рейд өткөрүлүп, бир катар мыйзам бузуулар аныкталды. Бул тууралуу Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаменти билдирди.
Маалыматка ылайык, 11-апрелде өткөн пландуу текшерүүнүн алкагында борбор калаадагы бир нече курулуш объектилери каралып, техникалык коопсуздук талаптарынын бузулганы белгиленди. Атап айтканда, Кулатов, Салиев, Сүюмбаев көчөлөрүндөгү турак үйлөр жана административдик имараттар, ошондой эле Жибек-Жолу проспектисиндеги медициналык борбор текшерүүгө алынган.
Рейддин жыйынтыгында курулуш иштерин жүргүзгөн компанияларга эскертүүлөр берилип, коопсуздук жана эмгекти коргоо талаптарын так сактоо милдеттендирилди.
Тиешелүү мекеме курулуш компанияларын бардык талаптарды сактоого чакырып, бул жарандардын өмүрү жана ден соолугун коргоонун негизги кепилдиги экенин баса белгиледи.
