Экономика министрлиги коммерциялык банктардагы депозиттерди милдеттүү камсыздандыруунун суммасын дароо эки эсеге, тагыраак айтканда, 200 миң сомдон 400 миң сомго чейин көтөрүүнү демилгелеп жатат.

“Банктык аманаттарды (депозиттерди) коргоо жөнүндө” КРнын мыйзамына өзгөртүү киргизүү тууралуу” мыйзам долбоору коомдук талкууга коюлду.

Экономика министрлиги белгилегендей, бул мыйзам долбоорунун милдети болуп – кепилденген учур (банкроттук) келген учурда коммерциялык банктардын, микрофинансылык компаниялардын жана турак жай-кредиттик компаниялардын аманатчыларынын депозиттери боюнча компенсациянын суммасын 200 миң сомдон 400 миң сомго чейин көбөйтүү эсептелет.

“Депозиттерди коргоо системасы аманатчыларды коргоого жана финансылык системанын туруктуулугун сактоого багытталган. Камсыздандырып ордун толтуруп төлөп берүүнүн деңгээли элдин банктарга болгон ишенимине жакшы таасирин тийгизет жана ошону менен депозиттик базанын көлөмүнө жакшы таасир этет. Камсыздандыруу төлөмүнүн деңгээли канча  жогору болсо, коммерциялык банктарда банктын кредиттик ишинин ресурсунун булактарынын бири болгон депозиттик базасы ошончолук кенен болот”, -деп айтылат долбоордун негиздемесинде.

КРда депозиттер боюнча компенсациянын, б.а. ордун толтуруп төлөп берүүнүн суммасы акыркы жолу 2016-жылы кайрадан каралган. Ага ылайык, компенсация 100 миң сомдон 200 миң сомго чейин көбөйтүлгөн эле.

Economist.kg маалымдагандай, 2019-жылы Экономика министрлиги коммерциялык банктардагы депозиттерди милдеттүү камсыздандыруунун суммасын 200 миң сомдон 300 миң сомго чейин көтөрүүгө аракет кылган. Белгисиз себептер менен бул сунуш ишке ашкан эмес.

Эмне үчүн аманаттарды камсыздандыруу керек?

Депозиттерди коргоо системасы аманатчыларды коргоого жана финансылык системанын туруктуулугун сактоого багытталган. Камсыздандырып ордун толтуруп төлөп берүүнүн деңгээли элдин банктарга болгон ишенимине жакшы таасирин тийгизет жана ошону менен депозиттик базанын көлөмүнө жакшы таасир этет.

Камсыздандыруу төлөмүнүн деңгээли канча  жогору болсо, коммерциялык банктарда банктын кредиттик ишинин ресурсунун булактарынын бири болгон депозиттик базасы ошончолук кенен болот.

Депозиттерди коргоо системасына катышкан банктардын реестрине депозиттерди кабыл алууга Улуттук банктан лицензия алган бардык коммерциялык банктар кирет.