Казакстан КРга жумуртка, ун, шоколад, макарон азыктарын экспорттойт - ал эми Кыргызстанчы?
Казакстан менен Кыргызстандын ортосундагы айыл чарба продукциясынын жүгүртүүсү сегиз айда дээрлик 160 млн долларга жеткенин Казакстандын Айыл чарба министрлигинин маалыматына шилтеме берүү менен kaztag.kz порталы билдирди.
Маалыматка таянсак, 2022-жылдын 8 айында Казакстан менен Кыргызстандын ортосундагы айыл чарба продукциясынын соода жүгүртүүсү 9%га өсүп, 159.9 млн долларды түзгөн.
“Казакстан негизинен жумуртка, сүт азыктары, ун, макарон, шоколад жана кондитердик азыктарды экспорттойт. Ал эми Кыргызстандан сүт азыктары, алкоголсуз суусундуктар импорттолот”, – деп айтылат казак порталынын берген маалыматында.
Ошондой эле Казакстан айыл чарба жаныбарларын экспорттоого чектөөлөрдү алып салгандан кийин, Кыргызстан менен асыл тукум малдар, ветеринария, фитосанитария, айыл чарба өсүмдүктөрүнүн генетикалык материалдарын алмашуу жаатында өз ара пайдалуу эки тараптуу кызматташтыкты активдүү өнүктүрүүгө кызыкдар экени айтылат.
Белгилей кетсек, Кыргызстан социалдык маанилүү товарлардын сап башында турган – буудайдын 57%ын Россиядан, 40%ын Казакстандан ташып келет.
