Ысык-Көлдүн балынын 1 кг Америкада 1600 сомдон сатылууда
Ысык-Көлдүн органик балы Американын Алабама штатынын маркеттеринде сатылууда. Мындай маалымат Фейсбуктагы «Кыргыз азыктарын сатып ал!» Өндүрүш өнүгүүнүн негизи! (Покупай Кыргызское! Производство основа развития!) баракчасында айтылды.
Баракчада Алабама штатында сатылып жаткан балдын сүрөтү коюлган. Анда балдын салмагы менен баасы 20 доллар деп көрсөтүлүп турат. Азыркы курс менен эсептегенде ал улуттук валютага – 1660 сом болот.
“Кыргызстандын бал өндүрүү тармагы болгону 10%га өнүккөн. Бизди дагы көп жакшылык жана ачылыштар күтүүдө. Бул тармакка жакшы көңүл буруу керек. Мамлекет дагы, жеке бизнес дагы. Бал тармагы өнүккөн жердин жалпы айыл чарбасы өнүгөт. Балдын айыл чарбага таасири төмөнкүдөй. 1кг өндүрүлгөн бал 300 сомго сатылса, анын таасири жалпы айыл чарбага 10500 сомго тете. Анткени ары учкан жерде жер көгөрөт, чөп бышат, бактагы гүл чаңдашып сонун мөмө берет, суу сакталат. Ошон үчүн бал тармагын өнүктүрөлү”, – дейт автор.
