Ысык-Көлдөгү бир мөңгү эми «шейх Заед бин Султан Аль Нахайян» деп аталат - президент ыйгарды
Садыр Жапаров Ысык-Көлдөгү бир мөңгүгө шейх Заед бин Султан Аль Нахайяндын ысымын ыйгарды. Бул тууралуу президенттин маалымат кызматы билдирди.
Президент Жапаров БАЭнин президенти, шейх Мухаммед бин Аль Нахайян менен жолугушуу учурунда ага Ысык-Көл облусундагы Ак-Шыйрак тоо кыркасында жайгашкан №354 мөңгүгө “шейх Заед бин Султан Аль Нахайян” географиялык аталышы ыйгарылганы жөнүндө билдирди.
“Мамлекет башчысы Мухаммед бин Заед Аль Нахайянга географиялык аталышты ыйгаруу жөнүндө сертификат менен аталган мөңгү чагылдырылган картинаны тапшырды”, – деп айтылат билдирүүдө.
Чечим кыргыз-эмират достугунун чыңдалышын белгилөө, шейх бин Заед Аль Нахайяндын Кыргызстан менен БАЭ ортосундагы эки тараптуу кызматташтыкты жолго коюуга жана өнүктүрүүгө кошкон маанилүү салымын эске алуу менен кабыл алынган. БАЭ Президенти Мухаммед бин Заед Аль Нахайян эмират элинин атынан терең ыраазычылык билдирип, бул демилгени жогору бааларын белгиледи.
