«Азаттыктын» эсептерин мыйзамсыз камакка алган деген доомат негизсиз - DemirBank
DemirBank “Азаттыктын” эсептерин мыйзамсыз камакка алган деген дооматтардын баары таптакыр негизсиз. Бул тууралуу аталган банктын маалымат кызматы “Азаттык Медиа” мекемесинин бөгөт коюлган эсебине жооп катары билдирди.
Эскерте кетсек, буга чейин “Азаттык Медиа” мекемеси “Демирбанктагы” эсебине бөгөт коюлганына байланыштуу банктан расмий түшүндүрмө сурап кайрылган. Банк “Азаттыктын” эсебине бөгөт коюлганын 31-октябрда билдирген. Банктын өкүлдөрү бул тууралуу телефон аркылуу оозеки ырастап, Улуттук коопсуздук боюнча мамлекеттик комитеттен (УКМК) билдирме алышканын айтышкан.
“Азаттыктын” эсеби боюнча операциялар ТИК/ККЛК мыйзамына ылайык токтотулган. Бул боюнча расмий жоопту банк анын жазуу түрүндөгү кайрылуусунун негизинде “Азаттыкка” билдирди. ТИК/ККЛК мыйзамынын талаптарын аткаруу Кыргызстандын бардык банктары үчүн милдеттүү жана жогоруда аталган мыйзамдын 32-беренесине ылайык, банктар банктык операцияларды токтото туруу үчүн жоопкерчилик тартышпайт, эгерде бул КРнын мыйзамдарына ылайык жана негизинде жасалган болсо”, – деп айтылат билдирүүдө.
Ал эми “Азаттык” болсо, банктык эсептерге соттук актынын негизинде гана камоо коюлушу мүмкүн экендигин айтат.
“Кыргызстандын “Банктар жана банк иши жөнүндө” мыйзамынын 58-беренесинин 1-бөлүгүнүн талаптарына ылайык, юридикалык жана жеке жактардын банктык эсептерде же сактоодо турган акча каражаттарына жана башка баалуулуктарына соттук актынын негизинде камоо коюлушу мүмкүн.
Укук коргоо органдарынын кызматкерлеринин өтүнүчү, талабы банктык эсеп боюнча операцияларды токтотууга негиз болуп саналбайт. Банк бул норманы бузган учурда, түзүлгөн келишимге ылайык, жоопкерчиликти банк тартат. Мындан тышкары, эгерде кызматкерлердин эмгек акысы Эмгек кодексинде белгиленген мөөнөттө өз убагында төлөнбөсө, банк материалдык зыянды төлөп берүүгө аргасыз болот”, – деп айтылат “Азаттыктын” маалыматында.
